De su Taylorismu a sa agilidadi

21 cabudanni 2015 -- articulu iscrittu de skuro

"Intuitzioni" est scrammentus cumprimius
K. Weick

Custu est su primu articulu de una sia apitzu de teorias agilis de organizatzioni aziendali in su settori informàticu, e de cumenti ddas biu deu cun is ogus meus. Spassia·ti!

In custu mesi de cabudanni in su nord de s'Europa, mesi canudu e gonfiu de acqua, tempu meda ti aparrat pro a ti poni a pensai, chi non c'est motivu perunu pro a ti leai a fora fintz'e su ditu mannu de su pei sceti. Custa fine xida mi seu postu a pensai a cumenti su pensamentu ebolviu si est asuba de is mellus maneras de si organizai in pari, pruschetotu in s'informatica, ovviamenti!

Organiza ita?

Donnia grupu de personas, pro a lòmpiri in pari a calisisiat obiettivu chi est postu a fundamentu de su grupu e totu, si depit donai una cali forma de organizatzioni.
Mescamenti in su mundu de is impresas, in ue su scopu est su de dispentzai a is clientes insoru servitzius o cosas contra a unu corrispetivu in dinai, su ordini chi ti narat chini est responsabile de ita e cumenti donniunu potzat decìdiri e at a decìdiri de fai ita, est sa prus intima natura de donnia impresa, prus che su servitziu chi produsit o de sa genti chi bi taballat.

Centalismu

In su mundu de s'informàtica, unu mundu fatu de ingegneris chi istudiant sistemas cumplessus, ddus analizant e ponint a pari architeturas e programmas otimizatos pro ddus assetiai, sa filosofia predominanti in su incumentzu de su seculu sa propria fiat che in totu is attras industrias: su Taylorismu, de ue scendiat deretu sa strategia Waterfall.

Candu esecutas su Waterfall, sa sia chi sighis una bidea de su xorbeddu de calincunu fintza a dda implementai in su programma, fata est de passus scrobaus, in ue su chi de su passu ainnantis produsiu est, est pigau in su passu avetanti che cumentzu, in pitzu de chi est basau su taballu chi at a abilitai su passu avetanti ancora, sighendi a fai a custa manera fintzas a candu sa funtzionalidadi noa no benit relasciada.

In pitzu de su Waterfall, sa strutura aziendali de stampu Taylorìstica chi a su solitu est posta a campu est strintamenti verticalista, in ue sa responsabilidadi de faddus o calisisiat problemas chi scobertu est in d'unu passu in sa cadena de produtzioni est responsabilidadi o de su manager de su passu e totu, o de su de su passu prima.

Evolutzioni

Una strutura de aici, in ue respetu de su pianu est sa cosa prus de importu, podit sceti funtzionai candu sa scientzia a palas de su chi ti ses ponendi a fai est totu cumpresa et precisa. Pro esempiu, si candu ses fraighendi unu ponti no sighis is dittàminis de sa ingegneria civili, prus chi unu ponti as a fraigai unu periculu publicu.

Ma su software no est de aici: puru chi seus in campu scientificu, nisciunu at scobertu sa manera perfetta de programmai pro a resolviri calisisiat problema, e nisciunu dda est fintz'e cicchendi! Peus puru, a dolu mannu de su Waterfall, oindie depis ligi de continu signalis mera de is umperadoris, clientis e de su sistema tuu e totu, chi su mundu mudat prus allestru de calisisiat pianu de atzioni, e cun issu is bisongius chi su servitzius tuus si dedicat mudant impari.

Ma s'omini no est de aici allestru a si abbillai de mudas, et is struturas de poderi funt prus inertziosas puru de is ominis chi ddas creant o ddas sunfrint. De aici, puru chi is teorias fiant prontas de sa fini de is annus 80, depis abetai fintza a su 2001 pro a chi calincunu una die si scirat e incumintzat sa revolutzioni: de cussu annu est su Manifestu Agili. De cussa die, su mundu de s'informatica est mudau deaderus, et su setori totu sighit a mudai donnia annu, cun teorias noas ghettadas a campu de donnia parti cunformendi is principius agilis a is pensamentus, cunditzionis e apretus nous.

Ma s'attenzioni tua si est giai sboidada de diora, e est mellus si si pigaus una pausa immoi. A si ligi in su prossimu articulu!